Presidenti amerikan Donald Trump nderoi të shtunën një grup prej emrash gjigantë të artit dhe kulturës amerikane, teksa ndau medaljet prestigjioze të Kennedy Center Honorees për vitin aktual, në një ceremoni të veçantë në Zyrën Ovale.
Figura të mëdha si aktori dhe regjisori Sylvester Stallone, i nominuar për Oscar dhe i pavdekshëm për rolin e “Rocky”-t; legjendarët e rock-ut KISS; diva e muzikës disko Gloria Gaynor; aktori britanik Michael Crawford, si dhe ikona e muzikës country George Strait, u nderuan personalisht nga presidenti.
“Ky është një grup ikonash, vepra dhe arritjet e të cilëve kanë frymëzuar, ngritur lart dhe bashkuar miliona amerikanë,” tha Trump gjatë ceremonisë, duke shtuar se sipas tij, “kjo është ndoshta klasa më e arrirë dhe më e famshme e Kennedy Center Honorees që është mbledhur ndonjëherë.”
Presidenti vendosi vetë medaljet rreth qafës së secilit artist, duke e kthyer momentin në një ceremoni të ngrohtë e simbolike. Medaljet e këtij viti, të prodhuara posaçërisht nga Tiffany & Co., kishin një dizajn të veçantë: në vend të shiritit tradicional shumëngjyrësh, ato vareshin në një shirit blu elegant, ku nga njëra anë ishte gdhendur emri i fituesit, ndërsa nga ana tjetër logoja e Kennedy Center me ngjyrat e ylberit.
Me këtë listë të yjeve të pavdekshëm, edicioni i këtij viti të Kennedy Center Honorees hyri direkt në histori.
