Zëdhënësi i Komisionit Qendror të Zgjedhjeve, Valmir Elezi, ka bërë të ditur se të shtunën në mesnatë është mbyllur procesi i regjistrimit të votuesve jashtë Kosovës për zgjedhjet e parakohshme parlamentare. Ai tha se vlerësimi i të gjitha aplikimeve do të finalizohet gjatë ditës.
Sipas të dhënave preliminare, gjatë periudhës 11-ditore (26 nëntor – 6 dhjetor), përmes platformës së KQZ-së diaspora.kqz-ks.org janë pranuar mbi 84,700 aplikime për regjistrim. Prej tyre, rreth 71,900 janë aprovuar, ndërsa afro 6,700 janë refuzuar. Aktualisht mbeten në proces vlerësimi rreth 5,900 aplikime.
Elezi konfirmoi se shumica dërrmuese e votuesve të regjistruar kanë zgjedhur të votojnë përmes postës. Mbi 51,000 persona kanë përzgjedhur të dërgojnë fletëvotimin në kutitë postare jashtë Kosovës, ndërsa rreth 2,500 të tjerë në kutinë postare të KQZ-së në Kosovë. Ndërkohë, afërsisht 18,000 qytetarë janë regjistruar për të votuar fizikisht në ndonjërën prej përfaqësive diplomatike.
Procesi i diasporës, që historikisht ka pasur interes të lartë, këtë herë ka shënuar një nga shifrat më të mëdha të aplikimeve, duke sinjalizuar pjesëmarrje të fortë në zgjedhjet e 28 dhjetorit.
