Kryetari i Nismës Socialdemokrate, Fatmir Limaj, ka deklaruar sot se lista e kandidatëve të partisë për zgjedhjet e 28 dhjetorit është më shumë sesa një renditje emrash. Sipas tij, ajo paraqet një bashkim të 110 grave dhe burrave që, siç thotë ai, përfaqësojnë ndershmëri, profesionalizëm dhe sakrificë për vendin.
Limaj theksoi se lista përmban ekonomistë, juristë, profesionistë të fushave të ndryshme, punëtorë, aktivistë politikë, si dhe ish-luftëtarë të UÇK-së që “kanë mbajtur barrën e Kosovës me punë e sakrificë”.
“Janë njerëz që nuk vijnë për privilegj, por për përgjegjësi. Janë bashkuar rreth një qëllimi të vetëm: që zëri i drejtë i kësaj rruge politike të kthehet në Kuvend”, theksoi Limaj.
Ai tha se lista e Nismës është thirrje për bashkim, maturi dhe veprim, duke rikujtuar vlerat që sipas tij e kanë mbajtur gjallë këtë subjekt: puna, besa, përkushtimi dhe integriteti.
Sipas Limajt, me këtë përbërje Nisma Socialdemokrate është e gatshme ta përfaqësojë qytetarin në Kuvend dhe të japë “kontribut të drejtë, të ndershëm dhe vendimtar për të ardhmen e Kosovës”.
“Bashkë e çojmë këtë zë në Kuvend”, përfundoi ai.
