Një anije e ngarkuar me ndihma humanitare nga Qeveria e Kosovës është nisur sot nga porti i Mersinit në Turqi drejt Gazës, konfirmoi Kryeministri Albin Kurti.
Dërgesa, me vlerë 500 mijë euro, përfshin tenda, pako ushqimore, batanije dhe 158 mijë racione ushqimi të ngrohtë, të destinuara për civilët që po përballen me kushte të rënda humanitare në Rripin e Gazës.
Kurti tha se edhe pse vendimi qeveritar ishte marrë në janar, dërgimi i ndihmave u bë i mundur vetëm pas marrëveshjes së fundit të paqes të arritur nën udhëheqjen e Presidentit amerikan Donald Trump.
“Kjo ndihmë përfaqëson angazhimin tonë si pjesë e solidaritetit ndërkombëtar dhe përkushtimin për të mbështetur popullin e Gazës në këto ditë tejet të vështira,” deklaroi Kurti, duke shtuar se Kosova për herë të parë po arrin të realizojë një dërgesë të këtij niveli për rajonin.
Ai theksoi se shpreson që ndihmat të lehtësojnë sado pak vuajtjet e civilëve dhe të kontribuojnë në përpjekjet për paqe, siguri dhe stabilitet.
Kryeministri falënderoi në mënyrë të veçantë Republikën e Turqisë dhe Gjysmëhënën e Kuqe Turke për bashkëpunimin dhe realizimin e operacionit humanitar.
