Rruga e Përparim Billës nga një kontrabandist cigaresh në New Jersey deri tek dosjet voluminoze të trafikimit të kokainës në Ekuador është një histori që të ngjeth mishin — një odise mes mafies shqiptare, kartelëve latinoamerikanë dhe hetimeve ndërkombëtare që kanë zgjatur më shumë se një dekadë.
Shqiptari i “Shqiponjës së Zezë”
Emri i Billës del për herë të parë në radarët e FBI-së në vitin 2009 gjatë operacionit famëkeq Black Eagle, një hetim katërvjeçar që tronditi në themel rrjetet shqiptare në SHBA dhe Evropë.
Operacioni shënjestroi liderët ballkanikë të mafies — Kujtim Lika dhe Myfit Dika — por gjatë çmontimit të strukturës së tyre u kapën edhe figurat më të ulëta, ndër to:
➡️ Përparim Billa, i njohur si “Rimi”, i lidhur drejtpërdrejt me kontrabandën e cigareve, një biznes i vogël krahasuar me heroinën e kokainën, por tepër fitimprurës për grupin.
FBI atëherë kishte sekuestruar:
-
30,000 pilula ekstazie
-
2.5 kg heroinë dhe metamfetaminë
-
armë të kalibrit të ndryshëm
-
dokumente të pastrimit të parave dhe llogari të kontrabandës së cigareve
Në këtë operacion u ndaluan 17 persona, ndërsa katër liderëve iu deshën vite për t’i kapur.
Dënimi i Billës në SHBA
Në vitin 2010, Billa u deklarua fajtor për “Marrjen e Cigareve Kontrabandë” dhe u dënua me:
-
1 vit e 1 ditë burg
-
2 vite lirim me kusht
Për amerikanët, ai ishte një figurë periferike. Por historia nuk mbaroi atje.
Nga SHBA në Ekuador — udhëtimi i errët drejt mafies shqiptare
Vetëm tre vite pas lirimit, Billa shfaqet në Ekuador me një identitet ekonomik krejt tjetër:
➡️ Regjistrohet si tregtar frutash, bishtajoreve e perimesh në Quito.
➡️ Hap një biznes në një zonë elitare të kryeqytetit.
➡️ Në 2020, kryen importe përmes Emirateve të Bashkuara Arabe.
➡️ Mbyll papritur aktivitetet në vitin 2022.
Ndërkohë, Ekuadori është kthyer në epiqendrën e mafies shqiptare, me Dritan Gjikën dhe klanin e tij që po shtrin tentakulat në të gjithë Paqësorin.
Në vitin 2025, mbiemri i Billës shfaqet sërish — këtë herë në dokumente gjyqësore ekvadore që lidhin emrin e tij me:
-
trafik ndërkombëtar droge
-
struktura korrupsioni multimilionëshe
-
rrjete të mafies ballkanike
-
grupin e armatosur ekuadorian Los Lobos, që vepron si krah i mafies shqiptare
Pse del në gjyq më 18 dhjetor?
Prokuroria e Ekuadorit kërkon që Billa të lidhet ligjërisht me një prej çështjeve më të mëdha të trafikimit të kokainës në hemisferën jugore:
dosjen e serbit Jezdimir Srdán (“Brate”), një operacion që shpalos shtegun e drogës nga Amerika Latine drejt Evropës në shifra industriale.
Bashkë me Billën, pritet të akuzohen edhe:
-
Uros Kolakovic (me identitet të dyfishtë ekvadorian)
-
dy shtetas të tjerë lokalë
Hetimi synon të provojë se Billa nuk ishte më “pjesëtar periferik”, por një hallkë e sofistikuar financiare që siguronte frontet ligjore për operacionet e kartelit.
Një detaj i çuditshëm: Billa ende ka një biznes aktiv në Shqipëri
Dokumentet shqiptare tregojnë se ai rezulton administrator i kompanisë LOV (Taxi Amor) në Tiranë, e hapur në vitin 2023.
Një taksi me aktivitet normal — e mbuluar me një histori kriminale globale poshtë saj.
