Organizata joqeveritare LIZA-R ka zhvilluar një takim koordinues me Drejtoreshën e Peace Corps Kosovo, znj. Aliyya Mattos, si dhe Menaxheren e Programit, znj. Merita Fehmiu, ku u diskutua bashkëpunimi i ardhshëm ndërmjet palëve.
Në këtë takim, organizata LIZA-R u përfaqësua nga Mensur Morina, njëherësh Prodekan në Fakultetin Juridik të Universitetit “Haxhi Zeka” në Pejë, i cili theksoi rëndësinë e partneriteteve ndërkombëtare në fuqizimin e rinisë dhe zhvillimin e qëndrueshëm të komuniteteve lokale.
Gjatë diskutimeve u bë e ditur se LIZA-R është përzgjedhur për të mirëpritur një vullnetar amerikan të Korpusit të Paqes për një periudhë dyvjeçare. Ky bashkëpunim pritet të kontribuojë drejtpërdrejt në fuqizimin e rinisë, zhvillimin e komunitetit, rritjen e potencialit njerëzor si dhe në përmirësimin e performancës institucionale të organizatës.
Përfaqësuesit e LIZA-R shprehën mirënjohje për bashkëpunimin me Peace Corps dhe për mbështetjen e vazhdueshme nga partnerët ndërkombëtarë, veçanërisht nga Shtetet e Bashkuara të Amerikës, të cilët po luajnë një rol aktiv në ndërtimin e kapaciteteve lokale në Kosovë.
Sipas organizatës, viti 2026 pritet të jetë një vit kyç për rininë e rajonit të Gjilanit, me më shumë projekte zhvillimore, rritje të aktivizmit qytetar, partneritete të reja dhe ngritje të standardeve të punës në terren.
LIZA-R vlerëson se bashkëpunimi me institucione dhe programe ndërkombëtare mbetet një shtyllë e rëndësishme për ndërtimin e një shoqërie më aktive, më të përgatitur dhe më gjithëpërfshirëse.
