Ministri i Punëve të Brendshme, Xhelal Sveçla, së bashku me kryetarin e Komunës së Gjilanit, Alban Hyseni, kanë vizituar pikën kufitare Dheu i Bardhë, ku janë njoftuar nga afër me përgatitjet institucionale për përballimin e rritjes së fluksit në prag të ardhjes së mërgatës.
Gjatë vizitës, Sveçla dhe Hyseni kanë bashkëbiseduar me zyrtarë policorë, duke u informuar për masat operative dhe logjistike që po ndërmerren për të garantuar qarkullim më të shpejtë dhe shërbime efikase për bashkatdhetarët.
Ministri Sveçla ka pasur gjithashtu rastin të takojë mërgimtarë që sapo kishin hyrë në Kosovë, duke i uruar mirëseardhje në atdhe.
Institucionet kanë theksuar se janë të përgatitura për sezonin e verës, kur pritet shtim i ndjeshëm i qarkullimit në pikat kufitare, me fokus të veçantë në siguri, rend dhe lehtësim të procedurave për qytetarët.
