Prishtinë, 19 dhjetor 2025 – Qeveria në detyrë e Republikës së Kosovës ka përshëndetur vendimin e Bashkimit Evropian për heqjen e masave ndaj Kosovës, duke i cilësuar ato si të padrejta që nga fillimi. Këto deklarata u bënë gjatë mbledhjes së sotme të Qeverisë, ku u diskutua edhe situata e sigurisë në veri të vendit dhe angazhimi institucional për ruajtjen e rendit dhe ligjit.
Sipas Qeverisë, institucionet e Kosovës nuk ishin përgjegjëse për eskalimin e situatës në katër komunat veriore, ndërsa deeskalimi i saj u arrit falë veprimeve të koordinuara dhe respektimit të ligjit. U theksua se Kosova dhe institucionet e saj kanë qenë cak i sulmeve terroriste, përfshirë incidentin në Banjskë të Zveçanit më 24 shtator 2023, ku mbeti i vrarë rreshteri policor Afrim Bunjaku, si dhe sulmin ndaj kanalit Ibër-Lepenc në Varagë të Zubin Potokut më 29 nëntor 2024, për të cilat tashmë janë ngritur aktakuza.
Qeveria paralajmëroi se çdo përpjekje për të cenuar sundimin e ligjit do të ketë pasoja, duke nënvizuar se stabiliteti dhe funksionimi i institucioneve në veri janë rezultat i respektimit të rendit publik. Pavarësisht sfidave, u ritheksua përkushtimi ndaj integrimit evropian dhe përmbushjes së kritereve për anëtarësim në BE.
Në këtë mbledhje u theksua gjithashtu se, sipas Qeverisë, masat financiare më të rënda ndaj Kosovës nuk erdhën nga Bashkimi Evropian, por nga opozita parlamentare, e cila pengoi miratimin e Planit të Rritjes së BE-së dhe marrëveshjeve me Bankën Botërore, me vlerë mbi 1 miliard euro.
Ndër vendimet e tjera të miratuara sot janë: konfirmimi i zbatimit të vendimeve dhe protokolleve të CEFTA-s, themelimi i Komisionit Profesional për ngritjen e Memorialit të Familjes Jashari dhe Epopenë e UÇK-së në Bashkinë Hora e Arbëreshëve në Itali, si dhe ndarja e 1.65 milionë eurove për grupin e parë të studentëve përfitues të Programit të Bursës së Mobilitetit.
Sipas Qeverisë, memoriali do të jetë një donacion për komunitetin arbëresh në Itali, ndërsa bursat synojnë të zvogëlojnë pabarazitë dhe të krijojnë mundësi të reja për studentët nga zonat më të largëta të vendit.
Në përmbyllje, Qeveria uroi mirëseardhjen e bashkatdhetarëve që po kthehen në vendlindje për festat e fundvitit, duke siguruar se të gjitha institucionet, përfshirë policinë kufitare, do të jenë të gatshme për mikpritje dhe shërbim ndaj qytetarëve.
