Një projekt i fokusuar në fuqizimin ekonomik të grave dhe të rejave, si dhe zhvillimin e kapaciteteve digjitale në komunën e Dragashit, është përmbyllur me sukses, duke përfshirë drejtpërdrejt 20 gra dhe të reja përfituese që morën pjesë në trajnimet dhe aktivitetet e organizuara.
Sipas raportit përfundimtar, projekti ka arritur objektivat kryesore të planifikuara, duke kontribuar në ngritjen e aftësive profesionale dhe digjitale të pjesëmarrëseve, si dhe në krijimin e mundësive të reja për promovim dhe zhvillim ekonomik.
Në kuadër të projektit janë realizuar aktivitete që kanë përfshirë planifikimin e veprimeve, identifikimin e hapësirave për realizimin e projektit, organizimin e trajnimeve dhe përmbylljen me raport final, aktivitete të zhvilluara gjatë muajve nëntor dhe dhjetor 2025.
Trajnimet e realizuara konsiderohen si një nga shtyllat kryesore të suksesit të projektit, pasi kanë ndikuar drejtpërdrejt në zhvillimin e kapaciteteve profesionale të përfituesve. Pjesëmarrëset kanë fituar njohuri praktike në përdorimin e platformave digjitale, marketingun online, menaxhimin e shitjeve dhe komunikimin me klientët, duke rritur kështu aftësinë e tyre për t’u përshtatur me tregun modern dhe mundësitë që ofron teknologjia.
Sipas organizatorëve, procesi i monitorimit dhe vlerësimit ka treguar rezultate pozitive, me rritje të aftësive digjitale, nivel të lartë kënaqësie nga përfitueset dhe potencial për zgjerim të mëtejmë të iniciativës. Formularët e vlerësimit dhe analizat e brendshme kanë konfirmuar ndikimin pozitiv të projektit në zhvillimin personal dhe ekonomik të pjesëmarrëseve.
Përveç ndikimit individual, projekti shihet edhe si një model me potencial afatgjatë për zhvillim lokal, pasi njohuritë e fituara dhe strukturat e krijuara pritet të vazhdojnë të shfrytëzohen edhe pas përfundimit të implementimit, duke hapur rrugë për iniciativa të reja në fuqizimin ekonomik dhe digjitalizimin e komunitetit lokal.