Sulmuesi Meriton Korenica mund të jetë pranë një largimi nga CFR Cluj gjatë merkatos së janarit. Mediat rumune raportojnë se klubi transilvan ka marrë një ofertë konkrete prej 2 milionë eurosh për kartonin e lojtarit, e cila vjen nga Apollon Limasol, skuadër që garon në elitën e futbollit qipriot.
Sipas këtyre raportimeve, klubi nga Qipro ka përgatitur tashmë kontratën për Korenicën. Në rast se transferimi realizohet, futbollisti 29-vjeçar do të përfitonte një pagë vjetore prej rreth 500 mijë eurosh, çka e bën ofertën shumë joshëse për të.
Meriton Korenica është një nga lojtarët kyç të CFR Cluj këtë sezon. Ai ka zhvilluar 20 ndeshje në të gjitha kompeticionet, duke shënuar 4 gola dhe duke dhënë 2 asistime, ndërsa roli i tij në repartin ofensiv ka qenë i rëndësishëm.
Sipas të dhënave të “Transfermarkt”, vlera aktuale e kartonit të Korenicës është 2.4 milionë euro. Në total, ai ka regjistruar 79 paraqitje me fanellën e CFR Cluj, me 18 gola dhe 14 asistime, statistika që e bëjnë një nga lojtarët më të vlefshëm të ekipit rumun.
Ditët në vijim pritet të jenë vendimtare për të ardhmen e sulmuesit , me Apollon Limasol që duket serioz për ta transferuar atë që në janar.
