Fatmir Limaj, kryetar i Nisma Socialdemokrate, ka deklaruar se ndryshimi i qeverisjes në Kosovë është i mundur vetëm përmes votës qytetare, duke theksuar se ankesa dhe pakënaqësitë politike nuk e ndryshojnë realitetin pa pjesëmarrje aktive në zgjedhje.
Duke folur në emisionin Debat Plus, Limaj tha se qytetarët janë çelësi i vetëm për ta nxjerrë vendin nga kriza politike dhe institucionale, ndërsa Nisma, sipas tij, përfaqëson një alternativë reale dhe të përgjegjshme për qeverisjen e ardhshme.
“Ndryshimi i qeverisjes nuk vjen me ankesa, por me votë. Vetëm qytetarët, përmes votimit, mund ta kthejnë Kosovën në rrugën e stabilitetit dhe përgjegjësisë,” u shpreh Limaj.
Ai theksoi se Kosova ka nevojë për një qasje më serioze dhe më bashkuese në udhëheqje, duke u larguar nga përçarjet dhe eksperimentet politike që, sipas tij, kanë dëmtuar funksionimin normal të shtetit.
Limaj bëri thirrje për mobilizim qytetar, duke nënvizuar se vota nuk është thjesht një akt formal, por një mjet real për rikthimin e stabilitetit, zhvillimit dhe dinjitetit institucional.
Duke vënë theksin te përvoja politike dhe qeverisëse e Nismës, ai deklaroi se vendi ka nevojë për udhëheqje me maturi dhe përgjegjësi, jo për improvizime dhe populizëm.
“Kosova ka nevojë për udhëheqje me përvojë dhe maturi, jo për eksperimente politike që e mbajnë vendin në krizë,” theksoi Limaj.
Në përmbyllje, ai u bëri thirrje qytetarëve që të marrin në dorë fatin e vendit përmes pjesëmarrjes aktive në zgjedhje, duke theksuar se vota për Nismën është votë për rend, siguri dhe një shtet që punon në shërbim të qytetarit.
