E diela në Kosovë pritet të karakterizohet me intervale kohore me diell dhe vranësira lokale, ndërsa gjatë ditës do të vërehet një ndryshim i ndjeshëm i kushteve atmosferike.
Erërat nga veriu dhe veriperëndimi do të fuqizohen gradualisht, duke shkaktuar ulje të temperaturave fillimisht në veri të vendit dhe më pas në të gjitha rajonet. Si pasojë, ndjesia subjektive e të ftohtit do të jetë më e lartë sesa vlerat reale të temperaturës.
Vende-vende, kryesisht në disa zona kodrinore-malore, mund të ketë reshje të pakta dhe afatshkurtra, kryesisht në formë rrebeshesh bore. Këto reshje pritet të jenë të shkurtra dhe pa ndikim të madh, megjithëse në momente të caktuara mund të shfaqen më intensive.
Temperaturat minimale pritet të zbresin deri në -3 gradë Celsius, ndërsa maksimalet do të arrijnë deri në 4 gradë Celsius.
