Kryetari i Lidhja Demokratike e Kosovës, Lumir Abdixhiku, ka hedhur sot votën e tij në qendrën e votimit të vendosur në shkollën Faik Konica, i shoqëruar nga bashkëshortja e tij.
Pas votimit, Abdixhiku uroi të gjithë qytetarët për këtë ditë të rëndësishme demokratike, duke shprehur shpresën se ata do të dalin masivisht për të votuar, me synim ndryshimin e gjendjes aktuale në vend.
“Më lejoni t’i uroj të gjithë qytetarët për këtë ditë, me shpresë që do të dalin të votojnë për zgjedhjet, me qëllim ndryshimin nga zymtësia që e ka kapluar vendin tonë. Le të shpresojmë që gjithçka të shkojë mbarë e mirë, ashtu siç di të veprojë populli i Kosovës”, u shpreh Abdixhiku.
Ai theksoi rëndësinë e pjesëmarrjes qytetare në procesin zgjedhor, duke e cilësuar votën si mjetin kryesor për ndryshim dhe forcim të demokracisë në Kosovë.
