CIA godet një strukturë portuale të dyshuar të bandës “Tren de Aragua”, pa viktima – tensionet me regjimin e Madurros përshkallëzohen
Shtetet e Bashkuara kanë kryer sulmin e parë të njohur brenda territorit të Venezuelës, duke shënuar një përshkallëzim të ri të fushatës amerikane kundër karteleve të drogës dhe duke rritur ndjeshëm tensionet me regjimin e presidentit venezuelian Nicolas Maduro.
Sipas burimeve të njohura me çështjen, CIA kreu në fillim të këtij muaji një sulm me dron ndaj një strukture portuale në bregdetin e Venezuelës, raportoi CNN. Ky operacion përfaqëson herën e parë që SHBA-të godasin drejtpërdrejt një objektiv tokësor brenda këtij shteti të Amerikës Latine.
Objektivi: bandat e trafikut të drogës
Sulmi kishte në shënjestër një skelë të largët portuale, e cila sipas vlerësimeve të qeverisë amerikane përdorej nga banda venezueliane Tren de Aragua për ruajtjen dhe transportimin e drogës drejt anijeve që më pas shpërndanin ngarkesat drejt destinacioneve të tjera.
Burimet bëjnë të ditur se nuk kishte persona në objekt në momentin e sulmit, ndaj nuk raportohet për viktima. Struktura dhe anijet e lidhura me të u shkatërruan.
Dy burime pohuan se Forcat e Operacioneve Speciale të SHBA-së kishin ofruar mbështetje inteligjence, por kjo u mohua nga Komanda e Operacioneve Speciale. Zëdhënësja e saj, kolonelja Allie Weiskopf, deklaroi se këto forca “nuk e mbështetën operacionin, përfshirë edhe aspektin e inteligjencës”.
Trump pranon sulmin, por pa detaje
Presidenti Donald Trump duket se e pranoi për herë të parë sulmin në një intervistë më 26 dhjetor, megjithëse pa dhënë detaje të qarta. I pyetur sërish të hënën nga gazetarët, ai konfirmoi se SHBA-të kishin goditur “zonën e portit ku ngarkohen anijet me drogë”, por refuzoi të sqarojë nëse operacioni u krye nga ushtria apo CIA.
“Ne goditëm anijet dhe tani goditëm zonën. Ajo zonë nuk ekziston më,” tha Trump.
Një fushatë gjithnjë e më agresive ndaj Venezuelës
Sulmi i CIA-s vjen në kuadër të një fushate gjithnjë e më agresive të administratës Trump kundër Venezuelës, e cila ka përfshirë një grumbullim të madh të aseteve ushtarake amerikane në Karaibe.
Deri më tani, SHBA-të kanë shkatërruar mbi 30 anije në Detin e Karaibeve dhe Paqësorin lindor, në kuadër të asaj që Uashingtoni e përshkruan si një luftë kundër narkotikëve. Trump ka urdhëruar gjithashtu bllokadën e cisternave të naftës të sanksionuara që hyjnë dhe dalin nga Venezuela.
Edhe pse presidenti amerikan kishte kërcënuar më herët me sulme brenda territorit venezuelian, deri në këtë operacion, veprimet amerikane ishin kufizuar në ujëra ndërkombëtare.
Qëllime politike dhe mesazhe simbolike
Një nga burimet e përshkroi sulmin si kryesisht simbolik, pasi skela ishte vetëm një nga shumë pikat e përdorura nga trafikantët e drogës. Megjithatë, veprimi shihet si një mesazh i qartë politik ndaj regjimit të Madurros.
Shefja e stafit të Trump, Susie Wiles, kishte deklaruar më herët për Vanity Fair se goditjet kishin për qëllim ta bënin presidentin venezuelian “të qante”, ndonëse Maduro nuk ka treguar shenja se do të largohet nga pushteti.
Trafikantët e drogës krahasohen me terroristët
Zyrtarët amerikanë kanë bërë të qartë se fushata kundër karteleve të drogës do të vazhdojë, duke përdorur taktika të ngjashme me ato të luftës globale kundër terrorizmit.
Sekretari i Mbrojtjes Pete Hegseth i ka krahasuar hapur trafikantët e drogës me organizatat terroriste.
“Këta narkoterroristë janë al-Kaeda e hemisferës sonë. Ne po i godasim me të njëjtën sofistikim dhe saktësi,” deklaroi ai në Forumin Kombëtar të Mbrojtjes Reagan.
Tensionet në rritje
Ky operacion pritet të përshkallëzojë më tej marrëdhëniet tashmë të tensionuara mes SHBA-së dhe Venezuelës, ndërsa mbetet e paqartë nëse administrata Trump do të zgjerojë më tej operacionet ushtarake brenda territorit venezuelian në muajt në vijim.
