Paga mbi 3,000 euro nuk mjafton – sektori paralajmëron rrezik kolapsi në zinxhirin e furnizimit
Logjistika në Gjermani po përballet me një nga krizat më serioze të dekadave të fundit. Mungesa akute e fuqisë punëtore ka krijuar një boshllëk prej më shumë se 120,000 shoferësh kamionësh, duke detyruar shumë kompani transporti të refuzojnë kontrata dhe dërgesa mallrash.
Paralajmërimi vjen nga Dirk Engelhardt, zëdhënës i Shoqata e Spedicionerëve Gjermanë të Mallrave (BGL), i cili në një deklaratë për Reuters tha se situata pritet të përkeqësohet edhe më tej.
Më shumë shoferë dalin në pension sesa hyjnë në treg
Sipas Engelhardt, çdo vit 30–35 mijë shoferë me përvojë dalin në pension, ndërsa vetëm 15–20 mijë shoferë të rinj hyjnë në tregun e punës.
“Hendeku midis ofertës dhe kërkesës për shoferë po zgjerohet vazhdimisht. Shumë kompani tashmë nuk janë në gjendje të marrin përsipër punë të reja,” theksoi ai.
Në Gjermani, rreth 80% e mallrave transportohen ende përmes rrugëve tokësore, pavarësisht përpjekjeve shumëvjeçare për ta zhvendosur transportin drejt hekurudhës. Kjo varësi e madhe nga kamionët e bën ekonominë veçanërisht të ndjeshme ndaj çdo ndërprerjeje në zinxhirin e furnizimit.
Rrezik gjeopolitik: kamionët e huaj mund të largohen
Engelhardt ngriti gjithashtu alarmin për rreziqe gjeopolitike, duke paralajmëruar se një përshkallëzim i mundshëm i konfliktit në Evropë Lindore mund të paralizojë transportin.
“Nëse agresioni rus do të përhapej në vende të tjera evropiane, shumë kamionë do të detyroheshin të ktheheshin në vendet e tyre të origjinës. Sot, pothuajse çdo kamion i dytë në rrugët gjermane ka targa të huaja,” tha ai.
Apel urgjent për viza pune jashtë BE-së
Shoqata BGL po u bën thirrje autoriteteve gjermane që të lehtësojnë procedurat për lëshimin e vizave të punës për shoferët nga vendet jashtë Bashkimit Evropian, në mënyrë që të plotësohen boshllëqet kritike në sektor.
Edhe pse paga mesatare bruto për shoferët e kamionëve tejkalon 3,000 euro në muaj, shpesh e shoqëruar me bonuse për punën e natës dhe orët shtesë, sektori mbetet jo tërheqës për të rinjtë.
Orët e gjata larg familjes, presioni i afateve dhe kushtet e vështira të punës po dekurajojnë hyrjen e gjeneratave të reja në këtë profesion jetik për ekonominë.
Sektori në udhëkryq
Ekspertët paralajmërojnë se, pa masa të shpejta dhe të qëndrueshme, kriza e shoferëve rrezikon të kthehet në një kolaps të plotë të logjistikës, me pasoja të drejtpërdrejta për furnizimin, industrinë dhe çmimet e mallrave në tregun gjerman dhe më gjerë.
