Kuvendi Komunal i Kaçanikut ka miratuar njëzëri propozimin për mbështetje financiare të nënave lehona, duke konkretizuar një nga premtimet e para publike të kryetarit të komunës, Sabedin Vishi.
Sipas vendimit të miratuar, çdo nënë lehonë në Komunën e Kaçanikut do të përfitojë 200 euro ndihmë financiare, ndërsa zbatimi i kësaj mase do të fillojë nga janari i vitit 2026.
Kryetari Vishi e ka cilësuar këtë vendim si një hap të rëndësishëm drejt forcimit të politikave sociale në komunë, duke theksuar se bëhet fjalë për angazhimin e tij të parë të realizuar pas marrjes së mandatit.
“Premtimi im i parë si Kryetar i Komunës së Kaçanikut për mbështetjen e nënave lehona, në vlerë prej 200 euro, sot u miratua unanimisht në Kuvend”, ka shkruar ai.
Ai ka shtuar se kujdesi për familjen dhe fëmijët do të mbetet prioritet qendror i qeverisjes lokale, duke garantuar përkushtim të vazhdueshëm institucional në këtë drejtim.
Nga Komuna e Kaçanikut është bërë e ditur se kriteret dhe procedurat e aplikimit për përfitimin e kësaj mbështetjeje financiare do të publikohen me kohë, para nisjes së zbatimit të vendimit.
Ky vendim pritet të ketë ndikim pozitiv në mirëqenien sociale dhe në mbështetjen e familjeve të reja në komunë, duke e bërë Kaçanikun një nga komunat që po avancon politikat sociale në nivel lokal.
