Kalimi nga viti 2025 në vitin 2026 nuk do të ndodhë brenda 24 orëve, siç mendohet zakonisht, por do të zgjasë plot 26 orë, për shkak të mënyrës se si është vendosur Vija Ndërkombëtare e Datës në Oqeanin Paqësor.
Festimet e Vitit të Ri do të nisin si zakonisht në Kiritimati, i njohur edhe si Ishulli i Krishtlindjeve, pjesë e Kiribati. Ky ishull është territori i banuar më lindor në botë dhe ndodhet 13 zona kohore përpara Evropës. Emrin e ka marrë nga Kapiteni James Cook, i cili e zbuloi më 25 dhjetor 1777.
Në Kiritimati, Viti i Ri ka nisur që dje, ndërsa pjesë të tjera të botës do të presin me orë – e madje me ditë – për të hyrë në 2026.
Edhe Sydney, që prej vitesh e quan veten “kryeqyteti botëror i Vitit të Ri”, do të duhet të presë rreth katër orë më shumë pas Ishullit të Krishtlindjeve për të ndezur fishekzjarrët ikonike.
Pse zgjat 26 orë?
Shkaku kryesor është Vija Ndërkombëtare e Datës, e cila nuk ndjek në mënyrë të drejtë meridianin e 180-të, por lëviz zig-zag nga veriu në jug. Që nga viti 1995, kjo vijë është zhvendosur dukshëm drejt lindjes për të përfshirë në të njëjtën datë arkipelagë si Samoa, Tonga dhe Kiribatin.
Si pasojë, duke udhëtuar rreth 2,500 kilometra nga Kiritimati drejt jugperëndimit, arrihet në Samoa, e cila do të jetë territori i fundit në botë që do të festojë Vitin e Ri, plot 26 orë më vonë.
Derisa mesnata të arrijë në ishullin Tutuila (më perëndimori i Samoas), në Ishulli Midway dhe në Hawaii, Viti i Ri do të ketë përfshirë tashmë pothuajse të gjithë planetin.
Rekordi i Rusisë
Shteti me më shumë “Nata të Vitit të Ri” mbetet Rusia, e cila shtrihet në 11 zona kohore, nga Kaliningradi në Detin Baltik deri në gadishullin Chukotka, pranë Alaskës. Për shkak se Vija Ndërkombëtare e Datës kalon nëpër Ngushticën e Beringut, Chukotka ruse dhe Alaska amerikane – megjithëse ndahen vetëm nga disa kilometra det – festojnë Vitin e Ri me 24 orë diferencë.
Një detaj gjeografik i vogël, por që e bën ndërrimin e viteve një spektakël global që zgjat më shumë se një ditë të tërë.
