Qeveria në detyrë e Republikës së Kosovës ka mbajtur sot një mbledhje elektronike, në të cilën ka miratuar tri vendime me rëndësi në fushën e kulturës, arkivistikës dhe sigurisë ndërkombëtare.
Në këtë mbledhje, ekzekutivi ka miratuar Rregulloren për Organizimin dhe Funksionimin e Këshillit Kombëtar të Arteve, e cila synon të rregullojë strukturën, kompetencat dhe mënyrën e funksionimit të këtij mekanizmi këshillëdhënës në fushën e artit dhe kulturës.
Po ashtu, është miratuar Rregullorja për Programin, Përmbajtjen, Mënyrën dhe Procedurat e Organizimit të Trajnimit Profesional për Zyrtarë Arkivorë, me qëllim të avancimit të kapaciteteve profesionale në menaxhimin dhe ruajtjen e dokumentacionit arkivor.
Një tjetër vendim i rëndësishëm është miratimi i nismës për lidhjen e Marrëveshjes së Përgjithshme të Sigurisë ndërmjet Republikës së Kosovës dhe Mbretëria e Bashkuar, e cila parasheh shkëmbimin dhe mbrojtjen e ndërsjellë të informacionit të klasifikuar.
Sipas njoftimit zyrtar, kjo marrëveshje synon forcimin e bashkëpunimit bilateral në fushën e sigurisë dhe krijimin e një kornize të besueshme për trajtimin e informacionit të ndjeshëm mes dy shteteve.
Vendimet e marra pritet të kontribuojnë në forcimin e institucioneve kulturore, profesionalizimin e administratës arkivore dhe thellimin e bashkëpunimit ndërkombëtar të Kosovës në fushën e sigurisë.
