E diela në Kosovë pritet të karakterizohet me vranësira të dendura dhe reshje të shpeshta lokale shiu. Reshjet do të jenë paksa më intensive në pjesët perëndimore, sidomos në veriperëndim të vendit.
Gjatë orëve të pasdites vonë, një sasi e vogël e ajrit të ftohtë, e cila po shkakton stuhi bore në rajon, pritet të depërtojë përkohësisht në verilindje dhe veri të Kosovës. Si pasojë, në këto zona mund të paraqiten shi i ngrirë, shqotë dhe borë, por vetëm për një periudhë shumë të shkurtër kohore.
Megjithatë, masat e ngrohta ajrore nga Mesdheu, të shoqëruara me erëra juglindore, do të shtyjnë sërish ajrin e ftohtë drejt vendeve fqinje veriore, duke rikthyer reshjet në formë shiu në shumicën e territorit.
Temperaturat do të mbeten të larta për këtë periudhë, pasi Kosova do të ndodhet në sektorin e ngrohtë të ciklonit mesdhetar. Vlerat maksimale pritet të arrijnë deri në 13 apo 14 gradë Celsius.
