Presidenti i Shteteve të Bashkuara, Donald Trump, ka publikuar të shtunën një video në rrjetet sociale, ku tall hapur presidentin tashmë të arrestuar të Venezuelës, Nicolas Maduro, duke rikthyer në vëmendje një deklaratë sfiduese të tij nga viti 2024.
Në videon e shpërndarë nga Trump, dëgjohet Maduro gjatë një fjalimi të zjarrtë të mbajtur në gusht të vitit të kaluar, ku ai i drejtohej drejtpërdrejt SHBA-së dhe vetë Trumpit, duke i sfiduar publikisht që ta arrestonin.
“Ejani dhe më kapni. Do të pres këtu në Miraflores. Mos vononi shumë, frikacakë,” kishte deklaruar Maduro, në kohën kur Uashingtoni kishte rritur shpërblimin për informacione që çonin në arrestimin e tij.
Videoja e publikuar nga Trump ndërthur këto pamje me imazhe simbolike të një shqiponje të bardhë, si dhe sekuenca nga operacionet ushtarake amerikane që çuan në arrestimin e Maduros. Klipi mbyllet me një mesazh të fortë nga Trump: “Kam vetëm tre gjëra për të thënë: Zoti e bekoftë ushtrinë tonë. Zoti e bekoftë Amerikën. Dhe ndizni motorët tuaj!”
Publikimi i videos shihet si një mesazh politik dhe propagandistik, në vijim të tensioneve të forta mes Uashingtonit dhe Karakasit, si dhe si një sinjal i qartë i administratës Trump për qasjen e saj të ashpër ndaj regjimeve që i konsideron armiqësore.
Reagime zyrtare nga autoritetet venezueliane ende nuk ka, ndërsa videoja ka shkaktuar reagime të shumta në rrjetet sociale, ku një pjesë e opinionit e sheh si triumfalizëm politik, ndërsa të tjerë paralajmërojnë për rritje të mëtejshme të tensioneve në rajon.
