Aleatët dhe armiqtë e Shteteve të Bashkuara kanë ngritur zërin njëzëri në Këshilli i Sigurimit i OKB-së, duke kritikuar ashpër operacionin ushtarak të Uashingtonit në Venezuelë që çoi në rrëzimin dhe arrestimin e presidentit Nicolás Maduro dhe bashkëshortes së tij, Cilia Flores.
Në një seancë emergjente të mbajtur të hënën, përfaqësues nga vende mike dhe kundërshtare të SHBA-së shprehën shqetësime serioze për shkeljen e sovranitetit, përdorimin e forcës dhe rrezikun e krijimit të një precedenti të rrezikshëm në marrëdhëniet ndërkombëtare, pas operacionit të autorizuar nga presidenti amerikan Donald Trump.
Danimarka, pa e përmendur drejtpërdrejt SHBA-në, mbrojti sovranitetin e Venezuelës dhe paralajmëroi se asnjë shtet nuk duhet të ndikojë në zhvillimet politike të një vendi tjetër përmes kërcënimit apo përdorimit të forcës. Paralelisht, Parisi shprehu rezerva të forta, me përfaqësuesin francez që theksoi se shkeljet e ligjit ndërkombëtar nga anëtarët e përhershëm të Këshillit të Sigurimit “gërryejnë vetë themelet e rendit global”.
Nga ana tjetër, SHBA-ja e mbrojti operacionin. I dërguari amerikan në OKB, Mike Waltz, e cilësoi ndërhyrjen si një veprim “kirurgjikal të zbatimit të ligjit”, duke argumentuar se Maduro nuk konsiderohet president legjitim nga shumë vende dhe duke e përshkruar atë si “narko-terrorist”.
Sekretari i Përgjithshëm i OKB-së, António Guterres, reagoi me tone të kujdesshme, duke thënë se është “thellësisht i shqetësuar” për mosrespektimin e së drejtës ndërkombëtare dhe paralajmëroi se veprime të tilla mund të krijojnë një precedent të rrezikshëm për të ardhmen.
Venezuela, përmes ambasadorit të saj në OKB, Samuel Moncada, kërkoi lirimin e menjëhershëm të Maduros dhe bashkëshortes së tij, duke paralajmëruar se tolerimi i rrëmbimit të një kreu shteti do ta shtynte botën drejt një rendi ku “ligji është opsional dhe forca bëhet arbitri i vetëm”.
Kina dhe Rusia, gjithashtu anëtare të përhershme të Këshillit të Sigurimit, dënuan ashpër veprimin e SHBA-së, duke e cilësuar atë si kthim në një “epokë paligjshmërie” dhe shkelje të hapur të parimeve të sovranitetit dhe mosndërhyrjes.
Ndërkohë, Maduro dhe Cilia Flores u paraqitën të hënën para një gjykate federale në Nju Jork, ku u deklaruan të pafajshëm për akuzat e narkoterrorizmit, duke këmbëngulur se arrestimi i tyre ishte i paligjshëm.
Debati në OKB tregoi qartë se ndërhyrja në Venezuelë nuk është thjesht një çështje rajonale, por një tronditje serioze për rendin ndërkombëtar, me pasoja që mund të shtrihen shumë përtej Amerikës Latine.
