Presidenti amerikan Donald Trump ka deklaruar se Venezuela do t’i dorëzojë Shteteve të Bashkuara deri në 50 milionë fuçi naftë, pas zhvillimeve të fundit politike dhe ushtarake në këtë shtet të Amerikës Latine.
Në një postim në platformën e tij Truth Social, Trump tha se nafta do të shitet me çmimin e tregut, ndërsa të ardhurat, që sipas vlerësimeve kapin shifrën rreth 2.8 miliardë dollarë, do të administrohen drejtpërdrejt nga ai si President i SHBA-së.
“Kam kënaqësinë të njoftoj se autoritetet kalimtare në Venezuelë do të furnizojnë midis 30 dhe 50 milionë fuçi naftë me cilësi të lartë, pa sanksione, në Shtetet e Bashkuara të Amerikës. Këto të ardhura do të përdoren në dobi të popullit venezuelian dhe amerikan”, shkroi Trump.
Sipas tij, kjo marrëveshje shënon një fazë të re ekonomike dhe energjetike për Venezuelën, pas rrëzimit nga pushteti të ish-presidentit Nicolás Maduro, i cili aktualisht përballet me akuza penale në Shtetet e Bashkuara.
Trump theksoi gjithashtu se industria amerikane e naftës pritet të rikthehet fuqishëm në Venezuelë, duke shtuar se brenda 18 muajsh infrastruktura energjetike e vendit mund të vihet plotësisht në funksion me ndihmën e kompanive amerikane.
Deklarata e presidentit amerikan ka shkaktuar reagime të shumta në arenën ndërkombëtare, me kritika për shkelje të sovranitetit të Venezuelës, por edhe me mbështetje nga qarqe që e shohin këtë si një mundësi për stabilizim ekonomik dhe furnizim energjetik global.
Venezuela zotëron rezervat më të mëdha të provuara të naftës në botë, por prodhimi i saj ka rënë ndjeshëm gjatë viteve të fundit për shkak të krizës politike, sanksioneve dhe mungesës së investimeve.
