Instituti Hidrometeorologjik i Kosovës (IHMK) ka njoftuar se nga data 5 deri më 6 janar 2026, në territorin e Republikës së Kosovës janë regjistruar reshje të konsiderueshme shiu, me një mesatare prej 43 milimetra për metër katror.
Sipas të dhënave të publikuara, sasia e reshjeve sipas pellgjeve lumore ka qenë si vijon:
-
Drini i Bardhë: 76.2 mm
-
Lepenci: 47.9 mm
-
Ibri: 27.8 mm
-
Morava e Binçës: 19.9 mm
IHMK bën të ditur se shumica e lumenjve në Kosovë, veçanërisht në pjesën perëndimore dhe qendrore të vendit, kanë shënuar ngritje të dukshme të nivelit të ujit gjatë këtyre dy ditëve. Në disa segmente, lumenjtë kanë dalë nga shtrati, duke shkaktuar përmbytje lokale.
Situata më e vështirësuar paraqitet në lumenjtë:
Drini i Bardhë, Ereniku, Bistrica e Deçanit, Toplluha, Klina, Mirusha, Lumi Drenica, Lumi i Istogut, si dhe degët e tyre me karakter malor, përfshirë përrenjtë, të cilët reagojnë shpejt ndaj reshjeve intensive.
Ndërkohë, IHMK njofton se lumenjtë në lindje dhe jug të vendit, si Ibri, Sitnica, Morava e Binçës, Lepenci dhe Nerodimja, aktualisht kanë vetëm ngritje të lehtë të niveleve dhe nuk paraqesin rrezik serioz në këtë fazë.
Instituti u bën thirrje qytetarëve dhe autoriteteve lokale që të qëndrojnë vigjilentë, veçanërisht në zonat pranë lumenjve dhe përrenjve, për shkak të mundësisë së reshjeve të tjera dhe vërshimeve lokale.
