Një digë anësore në lumin Sitnica, e cila kalon edhe në fshatin Rufc i Vjetër të Lipjanit, raportohet se është dëmtuar, duke rritur rrezikun për përmbytje dhe duke detyruar banorët e zonës të mobilizohen vetë, madje edhe gjatë orëve të natës.
Një lexues ka dërguar pamje në redaksinë e Klankosova.tv, ku shihet se banorët janë mbledhur rreth mesnatës për të monitoruar situatën dhe për të parandaluar depërtimin e ujit në zonat e banuara. Sipas tij, nga përmbytja rrezikoheshin rreth 30 shtëpi.
Lumi Sitnica raportohet se ka dalë nga shtrati para disa ditësh, si pasojë e reshjeve të mëdha dhe vërshimeve të fundit që kanë përfshirë disa pjesë të vendit. Në disa raste, përmbytjet kanë rrezikuar drejtpërdrejt edhe banorët, duke shkaktuar shqetësim dhe pasiguri.
Banorët kërkojnë ndërhyrje urgjente nga institucionet përgjegjëse për të sanimin e digës dhe për të parandaluar dëme eventuale në pronë dhe rrezikim të jetëve njerëzore, derisa situata vazhdon të monitorohet me shqetësim nga komuniteti lokal.
