Pagesat me para në dorë në Gjermani do të kufizohen zyrtarisht nga vera e vitit 2027, pas miratimit të një rregulloreje të re nga Bashkimi Evropian që synon forcimin e kontrollit financiar dhe luftimin e pastrimit të parave. Sipas rregullit të ri, pagesat me para të gatshme në transaksionet e biznesit nuk do të lejohen mbi shumën 10,000 euro.
Deri në hyrjen në fuqi të këtij kufizimi, në Gjermani ende lejohet pagesa me para në dorë për shuma më të mëdha, por vetëm me kushte të rrepta. Për transaksionet mbi 10,000 euro, blerësit duhet të dëshmojnë identitetin dhe origjinën e parave, ndërsa tregtarët janë të obliguar të regjistrojnë dhe ruajnë të dhënat e klientëve.
Nga viti 2027, çdo pagesë me para në dorë mbi 10,000 euro në kuadër të transaksioneve të biznesit do të ndalohet plotësisht, pavarësisht llojit të mallrave apo shërbimeve. Ndërkohë, për pagesa prej 3,000 eurosh e lart, mbledhja e të dhënave të klientëve do të vazhdojë të jetë e detyrueshme, siç zbatohet edhe aktualisht.
Rregullorja e re nuk prek transaksionet private ndërmjet personave fizikë. Kjo do të thotë se blerjet mes individëve privatë, si për shembull shitblerja e një makine, do të vazhdojnë të lejohen pa kufi të caktuar për pagesat në para të gatshme.
Gjermania tashmë ka vendosur disa kufizime në këtë drejtim. Që nga viti 2020, blerja anonime e metaleve të çmuara lejohet vetëm deri në 1,999.99 euro, ndërsa nga viti 2023, blerja e pasurive të paluajtshme me para në dorë është e ndaluar plotësisht.
Në nivel evropian, kufizimet ndryshojnë nga shteti në shtet. Franca dhe Spanja kanë vendosur një kufi prej 1,000 eurosh, Italia lejon pagesa me para në dorë deri në 5,000 euro, ndërsa vende si Estonia, Finlanda dhe Mbretëria e Bashkuar aktualisht nuk kanë kufizime të tilla. Me rregulloren e re, BE-ja synon të krijojë një standard të përbashkët, duke ruajtur një nivel fleksibiliteti kombëtar.
Megjithatë, masa ka nxitur kritika. Sipas një ankete të Bankës Federale Gjermane, rreth 93 për qind e qytetarëve dëshirojnë të ruajnë lirinë për të zgjedhur mënyrën e pagesës. Shumë prej tyre theksojnë se paratë e gatshme janë të rëndësishme për mbrojtjen e privatësisë dhe kontrollin personal mbi financat.
Pavarësisht kundërshtimeve, kufizimi i ri pritet të ndryshojë ndjeshëm zakonet e pagesave në Gjermani dhe në mbarë BE-në, veçanërisht për blerjet e mëdha dhe transaksionet e biznesit, ndërsa pagesat private do të mbeten më fleksibile.
