Kryeministri në detyrë i Republikës së Kosovës, Albin Kurti, ka pritur në takim Komandantin e Komandës së Forcave të Përbashkëta Aleate të NATO në Napoli, Admiralin amerikan George M. Wikoff.
Në takimin e parë mes tyre, kryeministri Kurti e uroi admiralin Wikoff për marrjen e detyrës së re, duke shprehur gatishmërinë për bashkëpunim të plotë dhe të vazhdueshëm. Ai vlerësoi komunikimin dhe ndërveprimin e mirë të Qeverisë së Kosovës me misionin e NATO-s në Kosovë, duke theksuar rolin e saj kyç në garantimin e sigurisë dhe paqes për të gjithë qytetarët pa dallim.
Kurti theksoi se Kosova përbën një rrëfim suksesi të ndërhyrjes së NATO-s, duke nënvizuar se çlirimi dhe pavarësia e vendit janë shndërruar në bazë të zhvillimit ekonomik, shtetndërtimit demokratik dhe rritjes së mirëqenies sociale. Në këtë kontekst, ai shprehu falënderimin e popullit të Kosovës për kontributin dhe mbështetjen e vazhdueshme të aleancës veri-atlantike.
Duke folur për situatën e sigurisë në vend dhe rajon, kryeministri Kurti ritheksoi synimin dhe angazhimin e Republikës së Kosovës për anëtarësim të plotë në NATO, duke e cilësuar këtë si përgjigjen më të mirë për paqe të qëndrueshme, stabilitet afatgjatë dhe siguri në rajon. Ai theksoi se siguria e Kosovës fillon nga mbrojtja dhe siguria e kufijve të saj.
Kryeministri e njoftoi admiralin Wikoff edhe për veprimet dhe rezultatet e institucioneve të Kosovës në luftën kundër krimit të organizuar dhe në forcimin e sundimit të ligjit, si dhe për investimet e shtuara në fushën e mbrojtjes. Në fund të takimit, Kurti falënderoi admiralin Wikoff për vizitën dhe bisedën konstruktive, si dhe për kontributin e vazhdueshëm të KFOR, misionit të NATO-s në Kosovë.
