Një takim me simbolikë të fortë politike dhe diplomatike u zhvillua të enjten në Shtëpinë e Bardhë, ku liderja e opozitës venezueliane, María Corina Machado, i ofroi Presidentit të Shteteve të Bashkuara, Donald Trump, Çmimin Nobel për Paqe që i ishte akorduar asaj në muajin dhjetor. Gjest i pazakontë, i cili ka nxitur debat dhe reagime në arenën ndërkombëtare.
Presidenti Trump e konfirmoi takimin përmes një postimi në rrjetet sociale, duke e cilësuar Machadon si “një grua të jashtëzakonshme” dhe duke e përshkruar gjestin e saj si “një shenjë respekti të ndërsjellë”.
“Ishte një nder i madh të takoja sot María Corina Machadon nga Venezuela. Ajo është një grua e jashtëzakonshme që ka kaluar shumë vështirësi. María më ofroi Çmimin e saj Nobel për Paqe për punën që kam bërë. Një gjest kaq i bukur respekti të ndërsjellë. Faleminderit, María!”, shkroi Trump.
Edhe vetë Machado e konfirmoi takimin, duke bërë të ditur se gjatë një dreke private në Shtëpinë e Bardhë, pa praninë e mediave, ajo ia dorëzoi personalisht Trumpit medaljen e Çmimit Nobel për Paqe.
“Ia dorëzova presidentit të Shteteve të Bashkuara medaljen, Çmimin Nobel për Paqe”, deklaroi ajo, duke e lidhur këtë veprim me një precedent historik nga Amerika Latine. Machado iu referua figurës së Simón Bolívarit dhe faktit se, dy shekuj më parë, markezi de Lafayette i kishte dhuruar atij një medalje me portretin e George Washingtonit, të cilën Bolívari e mbajti gjatë gjithë jetës.
“Dyqind vjet më vonë, populli i Bolívarit ia kthen trashëgimtarit të Washingtonit një medalje, në këtë rast Çmimin Nobel për Paqe, si njohje e angazhimit të tij unik për lirinë tonë”, u shpreh ajo.
Ndërkohë, Komiteti Norvegjez i Nobelit ka sqaruar se Çmimi Nobel për Paqe nuk mund të dhurohet apo të transferohet zyrtarisht, duke e bërë këtë veprim thjesht simbolik dhe pa efekt institucional.
Shtëpia e Bardhë konfirmoi takimin, duke theksuar se Presidenti Trump bëri një “vlerësim realist” të mbështetjes popullore që gëzon Machado në Venezuelë, por pa përcaktuar ndonjë afat apo angazhim konkret lidhur me zgjedhjet në vend.
Zëdhënësja e Shtëpisë së Bardhë, Karoline Leavitt, kishte deklaruar më herët se zgjedhjet nuk do të ishin temë diskutimi gjatë darkës, ndërsa Trump synonte kryesisht të informohej mbi situatën aktuale politike dhe sociale në Venezuelë.
Pas takimit, Machado u shpreh se “ne gjithmonë do të mund të mbështetemi te presidenti Trump për lirinë e Venezuelës”, duke e cilësuar takimin si “të mrekullueshëm”.
Politikania venezueliane, e cila së fundmi u largua nga vendi i saj pasi kishte qëndruar e fshehur për muaj të tërë, synon të luajë një rol kyç në të ardhmen politike të Venezuelës. Ndërkohë, gjesti i ofrimit të Çmimit Nobel për Paqe shihet gjerësisht si një akt me peshë të qartë politike dhe simbolike në përpjekjet e saj për mbështetje ndërkombëtare.
