Transmetimet satelitore të televizionit shtetëror iranian janë hakeruar nga persona të panjohur, të cilët kanë transmetuar mesazhe në mbështetje të Reza Pahlavi, duke u bërë thirrje forcave të sigurisë që të mos i drejtojnë armët kundër popullit.
Pamjet u shfaqën në disa kanale të kontrolluara nga Islamic Republic of Iran Broadcasting (IRIB), transmetuesi shtetëror që mban monopolin e mediave audiovizive në Iran. Në grafikë shkruhej: “Ky është një mesazh për ushtrinë dhe forcat e sigurisë. Mos i drejtoni armët kundër popullit. Bashkohuni me kombin për lirinë e Iranit.”
Reza Pahlavi kishte përcjellë edhe më herët mesazhe të ngjashme, duke theksuar se ushtria duhet t’i shërbejë kombit dhe jo Republikës Islamike, ndërsa i ftonte ushtarët të bashkohen me protestuesit.
Sulmi kibernetik ndodh në një moment kritik, kur sipas të dhënave bilanci i të vrarëve nga protestat ka arritur në gati 4.000 persona, edhe pse organizatat e të drejtave të njeriut paralajmërojnë se shifrat reale mund të jenë shumë më të larta.
Ky nuk është rasti i parë i ndërhyrjeve të tilla. Në vitin 2022, disa kanale iraniane transmetuan pamje të grupit opozitar Mujahedeen-e-Khalq, si dhe mesazhe kundër Ali Khamenei. Ndërsa më herët, në vitin 1986, CIA ishte përmendur nga The Washington Post si e përfshirë në një transmetim klandestin kundër regjimit iranian.
Mes protestave, presionit ndërkombëtar dhe luftës kibernetike, një gjë është e qartë: beteja për kontrollin e narrativës në Iran nuk zhvillohet më vetëm në rrugë, por edhe në ekran.
