Korporata Energjetike e Kosovës (KEK sh.a.) ka njoftuar se ka parashtruar padi ndaj Janina Imerit, rast i cili aktualisht ndodhet në shqyrtim nga organet kompetente të drejtësisë. Sipas KEK-ut, kjo padi është pjesë e veprimeve ligjore për mbrojtjen e integritetit institucional të Korporatës.
Në njoftimin zyrtar thuhet se KEK sh.a., në përputhje me kompetencat ligjore dhe legjislacionin në fuqi, ka ndërmarrë dhe do të vazhdojë të ndërmarrë çdo masë raportimi dhe veprimi ligjor, përfshirë raportimet në rrjetet sociale, me qëllim të ndalimit të përhapjes së informatave të rrejshme dhe propagandës, edhe në rastet kur ato vijnë nga zyrtarë publikë.
Korporata thekson se çdo përpjekje për të denigruar punonjësit apo përfaqësuesit e saj, si dhe atribuimi i përgjegjësive që nuk i përkasin KEK-ut, është e papranueshme dhe do të ndiqet deri në fund në rrugë ligjore.
Po ashtu, KEK ka mohuar pretendimet për mungesë transparence, duke sqaruar se nuk ekziston asnjë pengesë për qasje në informacionet zyrtare, të cilat janë publike, të verifikueshme dhe të qasshme përmes ueb-faqes zyrtare të Korporatës. Sipas KEK-ut, të dhënat e saj janë të krahasueshme edhe me ato të KOSTT.
Në përmbyllje, KEK sh.a. riafirmon përkushtimin e saj ndaj transparencës, informimit të saktë dhe mbrojtjes së integritetit institucional, duke bërë të qartë se ndaj dezinformimit nuk do të ketë tolerancë.
