KESCO Energy ka njoftuar se sistemi elektroenergjetik në Kosovë aktualisht po operon në kushte të vështira dimërore, si pasojë e temperaturave të ulëta dhe rritjes së ndjeshme të konsumit të energjisë elektrike, veçanërisht për ngrohje.
Sipas KESCO-s, në periudhat kur prodhimi vendor është i ulët, rritet ndjeshëm nevoja për import të energjisë. Megjithatë, këto mundësi janë të kufizuara për shkak të kufizimeve teknike të sistemit elektroenergjetik në të cilin operon Kosova, çka e bën të vështirë mbulimin e plotë të kërkesës në çdo moment.
Kompania bën të ditur se është vazhdimisht e angazhuar në shfrytëzimin e të gjitha mundësive për sigurimin e energjisë, përfshirë kontratat afatgjata dhe blerjet në tregjet afatshkurtra. Megjithatë, në situata me kërkesë shumë të lartë, mbulimi i plotë i nevojave paraqet sfida serioze operative dhe teknike.
Në këtë kontekst, KESCO u bën thirrje qytetarëve që të përdorin energjinë elektrike me kujdes, sidomos gjatë orëve të pikut, duke theksuar se kursimi i energjisë është i domosdoshëm për ruajtjen e stabilitetit të sistemit.
“KESCO mbetet e përkushtuar ndaj përmbushjes së obligimeve ndaj konsumatorëve dhe, në bashkëpunim të vazhdueshëm me institucionet relevante, po punon për sigurimin e furnizimit dhe stabilitetin e sistemit elektroenergjetik,” thuhet në njoftim.
Mes dimrit të ashpër dhe kërkesës rekord, çdo kilovat i kursyer bën diferencë. Energjia sot nuk është vetëm komoditet – është përgjegjësi e përbashkët.
