Kryeministri në detyrë i Republika e Kosovës, Albin Kurti, ka shpalosur vizionin e tij për mandatin e ardhshëm qeveritar gjatë një bashkëbisedimi në Davos me publicistin britanik Rory Stewart, duke theksuar se qeveritarët duhet të jenë shembull i mospërfshirjes në korrupsion.
Në këtë diskutim, Kurti tha se mandati i tij i ardhshëm do të fokusohet në pesë projekte kyçe zhvillimore:
-
krijimin e një banke zhvillimore,
-
ndërtimin e digave,
-
ndërtimin e stadiumeve,
-
gazifikimin e linjitit,
-
dhe zhvillimin e hekurudhave.
Kurti theksoi se Kosova ka nevojë urgjente për diga të reja, duke argumentuar se aktualisht ujërat rrjedhin jashtë territorit të vendit. “Do të shpenzojmë shumë para në pesë diga të reja. Kemi bërë studimet e fizibilitetit,” deklaroi ai.
Ai paralajmëroi gjithashtu ndërtimin e rreth 20 stadiumeve të futbollit, me kapacitet më të vogël, nga tetë deri në nëntë mijë ulëse, në kuadër të përgatitjeve për organizimin e Lojërave Mesdhetare së bashku me Durrësin.
Në fushën e energjisë dhe infrastrukturës, Kurti tha se synohet gazifikimi i linjitit dhe që ky mandat të kujtohet si “mandati i hekurudhave”, duke veçuar projektin Prishtinë–Durrës, për të cilin tha se studimi i fizibilitetit ka përfunduar dhe ekziston një marrëveshje me Shqipëria.
Publicisti Rory Stewart e sfidoi Kurtin duke ngritur shqetësimin se projekte të mëdha shtetërore dhe të financuara nga para publike, si hekurudhat, stadiumet dhe kreditë, shpesh shndërrohen në terren për korrupsion.
Në përgjigje, Kurti tha se shpresa më e madhe për luftimin e korrupsionit janë qytetarët, të cilët sipas tij duhet të raportojnë çdo rast të dyshimtë. Ai theksoi se Kosova ka kaluar nga një situatë ku korrupsioni ishte i përhapur, në një realitet ku ekziston vendosmëri për të mos u kthyer më pas.
“Së dyti, duhet të udhëheqim me shembull. Askush, absolutisht askush, brenda kabineteve ministrore nuk duhet ta ketë as imagjinatën më të vogël për përfshirje në korrupsion,” u shpreh Kurti.
Ai shtoi se Kosova është një shtet i monitoruar ngushtë nga organizatat ndërkombëtare, gjë që, sipas tij, shërben si mekanizëm shtesë parandalues ndaj dukurive korruptive.
Në deklarimet e tij, Kurti nuk përmendi rastet e përfshirjes së dyshuar në korrupsion të ministres së Tregtisë Rozeta Hajdari dhe ish-kryeshefit të KEK-ut, Nagip Krasniqi, të cilët janë konsideruar të afërt me qeverinë dhe Lëvizjen Vetëvendosje.
Mes planeve ambicioze dhe premtimeve për integritet, Kurti e vendosi theksin te një mesazh i vjetër, por i vështirë për t’u zbatuar: pa shembull nga lart, lufta kundër korrupsionit mbetet vetëm fjalë.
