Gjykata Supreme e Kosovës ka dalë me një sqarim publik lidhur me aktgjykimin P.A.nr.16/2025, duke theksuar se ka vepruar plotësisht brenda kompetencave të saj kushtetuese dhe ligjore dhe se përgjegjësia për zbatimin e vendimit nuk bie mbi gjykatat, por mbi institucionet ekzekutive.
Me këtë aktgjykim, Gjykata Supreme ka shpallur të paligjshëm dhe ka shfuqizuar:
-
nenin 4, paragrafi 2, si dhe
-
nenin 5, paragrafët 1, 2, 3 dhe 4
të Udhëzimit Administrativ nr. 05/2015 (MPMS), të cilat kishin të bënin me procedurat e lajmërimit, suspendimit nga pagesa dhe kthimit të mjeteve në rastet e pretenduara të keqpërdorimit të pensioneve.
Gjykata ka bërë të ditur se vendimi u është dorëzuar palëve në procedurë dhe është publikuar në Gazetën Zyrtare të Republikës së Kosovës, duke marrë kështu efekt të plotë juridik.
Në sqarim thuhet se Gjykata Supreme nuk ka kompetencë ligjore për të monitoruar apo mbikëqyrur zbatimin e vendimeve gjyqësore nga institucionet e tjera, ndërsa theksohet se çdo moszbatim i vendimeve përbën shkelje të parimit të sundimit të ligjit.
Aktgjykimi dhe sqarimi përkatës janë publikuar edhe në ueb-faqen zyrtare të Gjykatës Supreme, për qasje të plotë dhe transparente për publikun.
Mesazhi i Supremes është i prerë: gjykatat gjykojnë, vendimet janë detyruese — dhe zbatimi nuk është opsion, por obligim ligjor.
