Prokuroria Themelore në Ferizaj ka ngritur aktakuzën e parë penale që lidhet me zgjedhjet parlamentare të mbajtura më 28 dhjetor 2025, duke shënuar hapin e parë konkret të ndjekjes penale për shkeljet e dyshuara në procesin zgjedhor.
Sipas njoftimit zyrtar, aktakuza është ngritur për veprën penale “Asgjësimi i dokumenteve të votimit”, e paraparë në nenin 217 paragrafi 1 të Kodit Penal të Republikës së Kosovës. I pandehuri, me inicialet M.A., dyshohet se në ditën e zgjedhjeve ka dëmtuar dokumentet e votimit në një qendër votimi në qytetin e Shtimes, gjatë procesit për zgjedhjen e Kuvendit të Republikës së Kosovës.
Prokuroria bën të ditur se me veprimet e tij janë përmbushur të gjitha elementet e veprës penale, për çka aktakuza është dorëzuar pranë Gjykatës Themelore në Ferizaj – Departamenti për Krime të Rënda.
Njëkohësisht, Prokurori i Shtetit ka theksuar se të gjitha rastet eventuale që kanë të bëjnë me procesin zgjedhor të 28 dhjetorit 2025 do të trajtohen me prioritet të lartë dhe në përputhje të plotë me ligjin, me synim ruajtjen e integritetit të zgjedhjeve dhe forcimin e sundimit të ligjit në vend.
