Sipas një raportimi të Insajderi, një komunikim zyrtar i dërguar më 22 janar 2026 nga zëvendësministri i Arsimit, Arsim Ademi, drejtuar menaxhmentit të Universiteti i Gjakovës “Fehmi Agani”, ka nxjerrë në pah një sërë shkeljesh serioze administrative dhe ligjore.
Insajderi ka siguruar email-in e plotë, në të cilin zëvendësministri i drejtohet rektorit Drilon Bunjaku si “rektor i Fakultetit ‘Fehmi Agani’ në Gjakovë”, një formulim i pasaktë që tregon mosnjohje bazike të strukturës së arsimit të lartë. Universitetet drejtohen nga rektorët, ndërsa fakultetet nga dekanët, dhe UFAGJ është i themeluar me ligj si universitet publik, jo si fakultet.
Në të njëjtin komunikim, Ademi kërkon që urgjentisht të thirret mbledhja e Senatit për miratimin e Kalendarit të Studimeve për vitin akademik 2025/2026, me arsyetimin se kjo do të hapte rrugën për shpalljen e afatit të janarit për provime. Sipas Statutit të Universitetit, kalendari akademik duhet të miratohet deri në muajin maj të vitit paraprak, çka e bën këtë kërkesë jashtë çdo afati ligjor.
Raportimi i Insajderit thekson se gjuha e përdorur nga zëvendësministri është urdhëruese dhe ndërhyrëse, duke cenuar drejtpërdrejt autonominë universitare të garantuar me Ligjin për Arsimin e Lartë. Paralajmërimet për formimin e “komisioneve të pavarura” nga MASHTI janë interpretuar nga burime universitare si presion politik dhe jo si veprim institucional i bazuar në ligj.
Email-i është dërguar në kopje edhe te ministrja e Arsimit, Arbërie Nagavci, si dhe te zëvendësministri tjetër, Taulant Kelmendi. Sipas Insajderit, ky rast ngre pikëpyetje serioze për nivelin e kompetencës institucionale dhe respektimin e autonomisë së universiteteve publike nën qeverisjen aktuale.
