Nga Prof.Asoc. Dr. Artan Nimani
Aktgjykimi i sotëm i Gjykatës Kushtetuese (KO325/25) e ka zhveshur përfundimisht nga çdo justifikim politik dhe institucional procesin e zgjedhjes së nënkryetarit të Kuvendit më 10 tetor 2025, duke konstatuar se ai ka qenë qartazi antikushtetues.
Përkundër këtij fakti, Presidentja e Republikës, znj. Vjosa Osmani-Sadriu, në kundërshtim me rolin e saj kushtetues si garantuese e rendit kushtetues, ka pranuar dhe certifikuar një Kuvend të konstituar në mënyrë jokushtetuese, duke e shndërruar shkeljen nga një devijim procedural në bashkëpërgjegjësi institucionale.
Ky veprim nuk është thjesht gabim interpretimi, është shkelje e vetëdijshme e Kushtetutës.
Si pasojë direkte e këtij konstituimi të paligjshëm:
- Nominimet e mandatarëve për Kryeministër, përfshirë z. Albin Kurti dhe z. Glauk Konjufca, janë bërë mbi një bazë juridike të kontaminuar;
- Shpërbërja e Kuvendit ka qenë e ndërtuar mbi një akt fillestar antikushtetues;
- Mbajtja e zgjedhjeve të mëvonshme ka ndodhur në kushte të një krize të thellë kushtetuese, duke cenuar parimin e legjitimitetit demokratik.
Kjo përbën një reaksion zinxhir të shkeljeve kushtetuese, ku çdo akt pasues është përpjekur të mbulojë shkeljen paraprake, duke prodhuar një çrregullim serioz të sistemit shtetëror dhe duke e futur Republikën e Kosovës në një zonë gri juridike, me pasoja të rënda ligjore, institucionale dhe politike.
Parimi i sigurisë juridike, i përdorur nga Gjykata për të shmangur prapaveprimin, nuk mund të shndërrohet në alibi për normalizimin e shkeljeve kushtetuese. Përndryshe, Kushtetuta reduktohet në një dokument formal pa fuqi reale.
Shteti i së drejtës nuk mbahet me improvizime politike dhe as me vota të manipuluara proceduralisht. Ai mbahet vetëm me respektim strikt të Kushtetutës, pa përjashtime, pa kalkulime dhe pa kompromis.
Heshtja ndaj kësaj situate nuk është neutralitet, është bashkëfajësi
