Presidenti i SHBA-së, Donald Trump, ka paralajmëruar se afrimi i Mbretërisë së Bashkuar me Kinën është “shumë i rrezikshëm”, pas vizitës së kryeministrit britanik Keir Starmer në Pekin.
Komentet e Trump erdhën pasi Starmer u takua me presidentin kinez Xi Jinping, ku u dakordua për udhëtim pa viza për qytetarët britanikë deri në 30 ditë dhe për uljen e tarifave kineze mbi uiskin skocez. Kryeministri britanik bëri thirrje për një marrëdhënie “më të sofistikuar” mes dy vendeve, duke theksuar se Londra nuk synon të zgjedhë mes Uashingtonit dhe Pekinit.
Duke folur në Uashington, Trump tha se një qasje e tillë bart rreziqe të mëdha. “Është shumë e rrezikshme për ta ta bëjnë këtë,” u shpreh ai, duke shtuar se, sipas tij, është “edhe më e rrezikshme” që Kanadaja të forcojë lidhjet me Kinën. Presidenti amerikan theksoi se, pavarësisht njohjes personale me Xi, bashkëpunimi i ngushtë me Pekinin përbën “një pengesë të madhe për t’u kapërcyer”.
Nga ana e Londrës, zyrtarë qeveritarë thanë se SHBA-të ishin njoftuar paraprakisht për vizitën dhe objektivat e saj. Starmer, gjatë udhëtimit për në Pekin, theksoi se marrëdhënia me SHBA-në mbetet ndër më të ngushtat për Mbretërinë e Bashkuar, veçanërisht në mbrojtje, siguri, inteligjencë dhe tregti. “Nuk ka kuptim të fshehim kokën në rërë kur bëhet fjalë për Kinën,” tha ai, duke shtuar se angazhimi do të bëhet pa kompromentuar sigurinë kombëtare.
Vizita e Starmer në Kinë vjen në një moment tensioni në marrëdhëniet transatlantike, teksa administrata Trump ka paralajmëruar se do të ndjekë me kujdes çdo afrimi të aleatëve perëndimorë me Pekinin.
