Më 31 janar 1997 u zhvillua njëra nga betejat e para madhore të Ushtrisë Çlirimtare të Kosovës (UÇK), në të cilën ranë heroikisht tre prej figurave kyçe të rezistencës së armatosur: Zahir Pajaziti, Hakif Zejnullahu dhe Edmond Hoxha.
Tre strategët e UÇK-së po udhëtonin nga Prishtina në drejtim të Vushtrrisë, kur u zbuluan nga forcat e sigurimit serb dhe ranë në një pritë të organizuar në fshatin Pestovë, ku pas një përleshjeje të armatosur, ranë në luftë.
Zahir Pajaziti – arkitekt i hershëm i rezistencës së armatosur
Zahir Pajaziti aktivitetin e tij atdhetar e nisi në fillim të viteve ’90. Gjatë grevave të përgjithshme të 3 shtatorit 1990, ai u angazhua në ndërtimin e rrjeteve të sigurisë dhe më pas në formimin e Shtabit të Njësisë Guerile në Orllan.
Në vitin 1991, ai shkoi në Shqipëri për përgatitje ushtarake, ndërsa pas kthimit në Kosovë veproi në ilegalitet, duke kontribuar në furnizimin me armatim dhe zgjerimin e strukturave të UÇK-së. Pajaziti ishte një nga themeluesit e Shtabit të Përgjithshëm të UÇK-së dhe një nga organizatorët më të spikatur të sulmeve guerile, veçanërisht në rajonin e Llapit.
Më 31 janar 2008, Presidenti i Kosovës Fatmir Sejdiu e dekoroi atë me Urdhrin “Hero i Kosovës”, dekorata më e lartë shtetërore.
Edmond Hoxha – brezi i ri i qëndresës
Edmond Hoxha, i riu nga Juniku, përfaqësonte gjeneratën që vendosi ta shndërrojë dhimbjen në rezistencë. I frymëzuar nga përvoja familjare dhe përndjekjet e hershme, ai zgjodhi rrugën e luftës si vazhdimësi e traditës së qëndresës dhe sakrificës për liri.
Hakif Zejnullahu – luftëtari i heshtur
Hakif Zejnullahu njihej për heshtjen dhe përkushtimin e tij të rrallë. Ai ishte zëvendës dhe bashkëpunëtor i afërt i Zahir Pajazitit, duke luajtur një rol thelbësor në organizimin dhe funksionimin e strukturave të para të UÇK-së, larg vëmendjes publike, por me ndikim të jashtëzakonshëm.
31 janari mbetet një datë simbolike në historinë e luftës për liri të Kosovë, duke kujtuar sakrificën e tre luftëtarëve që vendosën themelet e rezistencës së armatosur dhe rrugën drejt çlirimit.
