Një rast i keqpërdorimit të kartelës bankare është zbuluar në Prishtinë, ku Policia ka arrestuar një person të dyshuar për kryerjen e pagesave të paautorizuara, duke i shkaktuar viktimës dëm financiar të konsiderueshëm.
Burime nga hetimi bëjnë të ditur se i dyshuari, Fikret K., dyshohet se më 29 janar 2026, në rrugën UÇK në Prishtinë, ka përdorur pa autorizim kartelën bankare të një qytetari dhe ka realizuar pagesa në disa lokacione të ndryshme, në vlerë totale rreth 2 mijë e 400 euro.
Pas veprimeve hetimore dhe identifikimit të tij, Kruezi është arrestuar më 30 janar 2026, rreth orës 20:00, dhe është shoqëruar në stacion policor për intervistim.
Me vendim të Prokurorit të Shtetit, ndaj të dyshuarit është caktuar masa e ndalimit prej 48 orësh, ndërsa rasti është iniciuar për veprën penale “keqpërdorim i kartelës bankare”.
Hetimet lidhur me këtë rast janë në zhvillim dhe autoritetet po punojnë për të sqaruar plotësisht rrethanat e ngjarjes dhe përfshirjen eventuale të personave të tjerë.
