Shërbimi Korrektues i Kosovës dhe Departamenti Shëndetësor i Burgjeve kanë njoftuar se mbrëmë rreth orës 22:00 ka ndodhur një rast i rëndë në Burgun e Sigurisë së Lartë, ku një i burgosur është gjetur pa shenja jete në dhomën e tij.
Sipas njoftimit zyrtar, i burgosuri me inicialet E.G. është gjetur i varur, me puls të dobësuar. Menjëherë pas konstatimit të rastit kanë reaguar stafi korrektues, ekipi mjekësor i institucionit dhe shërbimet emergjente të qytetit.
Pavarësisht përpjekjeve për ofrimin e ndihmës mjekësore dhe ndërhyrjes së shpejtë, i burgosuri nuk ka arritur të rikthehet në jetë.
I ndjeri ishte i dënuar për dy vepra penale të dhunimit dhe ishte pranuar në institucion më 15 gusht 2024, ndërsa lirimi i tij ishte paraparë më 1 mars 2048.
Lidhur me rastin janë njoftuar Policia e Kosovës dhe prokurori kompetent. Shërbimi Korrektues i Kosovës, në bashkëpunim me Departamentin Shëndetësor të Burgjeve, ka iniciuar procedurat hetimore dhe administrative për të sqaruar të gjitha rrethanat e ngjarjes.
Autoritetet kanë bërë të ditur se për çdo zhvillim të ri do ta informojnë opinionin publik në kohë.
