Gjykimi ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, po hyn në fazën përmbyllëse.
Dhomat e Specializuara të Kosovës kanë publikuar një video përmbledhëse të procesit gjyqësor, ku shpjegohet rrjedha e çështjes që nga konfirmimi i aktakuzës e deri te paraqitja e dëshmitarëve gjatë shqyrtimit gjyqësor.
Sipas njoftimit zyrtar, fjalët përfundimtare të mbrojtjes do të nisin më 9 shkurt, pas së cilave trupi gjykues do të fillojë procesin e vlerësimit të brendshëm dhe konfidencial të çështjes.
“Fjalët përfundimtare në gjyqin Thaçi etj. do të fillojnë më 9 shkurt”, thuhet në njoftimin e Gjykatës.
Specialja ka bërë të ditur se gjatë kësaj faze, gjyqtarët do të vlerësojnë peshën dhe besueshmërinë e secilit dëshmitar, si dhe çdo provë të paraqitur nga palët, përpara se të marrin një vendim përfundimtar.
Ky proces shënon një nga momentet më të rëndësishme të këtij gjykimi, i cili ka ngjallur vëmendje të madhe publike në Kosovë dhe më gjerë, për shkak të rëndësisë historike dhe politike të figurave të përfshira.
