Presidenti kinez Xi Jinping zhvilloi të mërkurën një videokonferencë me homologun e tij rus Vladimir Putin, ku u fokusuan te forcimi i bashkëpunimit dypalësh, marrëdhëniet me Shtetet e Bashkuara dhe zhvillimet kryesore gjeopolitike globale.
Biseda erdhi pak para një telefonate të planifikuar mes Xi dhe Presidentit amerikan Donald Trump, në një moment kur tensionet ndërkombëtare dhe rivalitetet strategjike po thellohen. Dy udhëheqësit theksuan se lidhja Moskë–Pekin mbetet “një faktor stabilizues” në një botë me turbulenca në rritje.
Putin riafirmoi mbështetjen për bashkëpunimin strategjik me Kinën, duke theksuar sovranitetin, sigurinë dhe zhvillimin socio-ekonomik të të dy vendeve. Xi, nga ana e tij, foli për shfrytëzimin e “një mundësie historike” për thellimin e partneritetit dhe krijimin e një “plani të ri” për marrëdhëniet Kinë–Rusi.
Sipas këshilltarit të Kremlinit për politikën e jashtme, Yuri Ushakov, palët shkëmbyen pikëpamje të përbashkëta për raportet me SHBA-në dhe mbështetën bashkëpunimin e barabartë mbi bazën e së drejtës ndërkombëtare dhe Kartës së OKB-së. U diskutuan gjithashtu çështje si stabiliteti strategjik bërthamor, Irani, si dhe situata në Venezuelë e Kubë.
Gjatë telefonatës, Putin ritheksoi mbështetjen e Rusisë për politikën kineze të “Një Kine” lidhur me Tajvanin, ndërsa Xi e ftoi presidentin rus për një vizitë zyrtare në Kinë gjatë gjysmës së parë të vitit, ftesë që Putin e pranoi.
Takimi virtual sinjalizon vazhdimin e afrimit strategjik mes Pekinit dhe Moskës, në një kohë kur të dyja vendet përballen me presione dhe sfida nga Perëndimi.
