Agjencia e Ushqimit dhe Veterinarisë (AUV) ka njoftuar opinionin publik se ka bllokuar menjëherë produktin ushqimor për foshnja BEBA SUPREM PRE, paketim 800 gram, pas një njoftimi zyrtar të pranuar nga Republika e Shqipërisë, përkatësisht nga Autoriteti Kombëtar i Ushqimit.
Sipas AUV-së, produkti në fjalë është eksportuar nga subjekti “Rossmann & LALA SH.P.K.” në Shqipëri drejt Republikës së Kosovës dhe është importuar nga kompania Rossmann Kosova. Produkti ka datë skadimi 05.2027 dhe kod identifikues EAN: 7613287226631.
Agjencia bën të ditur se, në bashkëpunim me kompaninë përkatëse, është ndërmarrë bllokimi i menjëhershëm i sasisë së importuar, ndërsa në ditët në vijim do të fillojë procesi i asgjësimit, në përputhje me legjislacionin në fuqi.
AUV thekson se, pavarësisht sfidave të vazhdueshme, përfshirë mungesën e inspektorëve, mbetet e përkushtuar në monitorimin e vazhdueshëm të tregut dhe zinxhirit ushqimor, me synim garantimin që qytetarët e Republikës së Kosovës të kenë në dispozicion ushqim të sigurt dhe të shëndetshëm, veçanërisht kur bëhet fjalë për produkte të ndjeshme si ushqimi për foshnja.
