Kryetari i Lidhja Demokratike e Kosovës, Lumir Abdixhiku, ka reaguar publikisht pas kritikave dhe sulmeve që pasuan Kuvendin e fundit të partisë, duke theksuar se vendimi i lirë i anëtarësisë nuk mund të tjetërsohet dhe as të vihet në pikëpyetje nga prapaskenat politike.
Në një reagim të drejtpërdrejtë, Abdixhiku flet për një “mosdurim të thellë” ndaj vendimit të anëtarëve të LDK-së, duke akuzuar kundërshtarët e brendshëm për sulme ndaj tij personalisht, ndaj partisë, familjes Rugova dhe veprimtarëve të saj në tërësi.
Sipas tij, kjo klimë sulmesh lind sa herë që “prapaskena mbetet pa rol” dhe kur anëtarësia, me qetësi dhe dinjitet, mbyll kapituj të vjetër politikë. Abdixhiku e cilëson Kuvendin jo thjesht si një proces demokratik, por si një ndarje të qartë mes së kaluarës dhe një faze të re rimëkëmbjeje dhe përgjegjësie politike.
Ai thekson se LDK do të bashkohet, por jo përmes presioneve, intrigave apo përpjekjeve për të deformuar vullnetin e anëtarësisë.
“Rrugët që kthehen mbrapa nuk janë më tonat”, shprehet Abdixhiku, duke shtuar se fundi i një roli politik nuk është fundi i botës, por pranim i kohës që ka ecur përpara.
Në përmbyllje, ai nënvizon se LDK do të ecë përpara me njerëzit e saj, me besimin dhe dinjitetin e zgjedhjes së lirë, duke lënë të kuptohet se debatet e brendshme nuk do ta ndalin drejtimin aktual të partisë.
