Presidenti i Ukrainës, Volodymyr Zelensky, ka deklaruar se Shtetet e Bashkuara të Amerikës po shtyjnë fuqishëm për përfundimin e luftës mes Ukrainës dhe Rusia deri në muajin qershor, duke zbuluar se Uashingtoni ka propozuar për herë të parë një takim të drejtpërdrejtë mes ekipeve negociuese të dy vendeve në territorin amerikan.
Sipas Zelenskyt, të dyja palët janë ftuar për bisedime javën e ardhshme në SHBA, me mundësi që takimi të mbahet në Miami.
“Amerika propozoi për herë të parë që dy ekipet negociuese – Ukraina dhe Rusia – të takohen në Shtetet e Bashkuara, ndoshta në Miami, brenda një jave. Ne konfirmuam pjesëmarrjen tonë”, tha Zelensky.
Deklarata e tij u bë në komentet për mediat, të publikuara nga BBC, pas raundit të dytë të bisedimeve të ndërmjetësuara nga SHBA-të në Abu Dhabi, të cilat përfunduan pa ndonjë përparim konkret.
Zelensky pranoi se “çështjet e vështira mbetën të vështira”, duke përmendur veçanërisht presionin ndaj Ukrainës për lëshime territoriale. Megjithatë, ai theksoi se për herë të parë është diskutuar edhe mundësia e një takimi trepalësh mes udhëheqësve.
I pyetur për një afat kohor të mundshëm për arritjen e marrëveshjes, presidenti ukrainas u shpreh:
“Amerikanët thonë se duan të bëjnë gjithçka deri në qershor”.
Ndërkohë, luftimet vazhdojnë në terren, me Rusinë që ka intensifikuar sulmet ndaj infrastrukturës energjetike të Ukrainës, duke shkaktuar ndërprerje të energjisë elektrike në kushte të temperaturave ekstreme.
Presidenti amerikan Donald Trump ka bërë prej kohësh presion për t’i dhënë fund konfliktit, që nga rikthimi i tij në Shtëpinë e Bardhë.
