Policia e Kosovës ka iniciuar dy raste penale për “Falsifikim të parasë” dhe “Posedim të paautorizuar të narkotikëve”, pas një incidenti të raportuar në fshatin Prelez i Jerlive.
Sipas njoftimit zyrtar, më 6 shkurt rreth orës 19:30, në një pompë të derivateve është raportuar përdorimi i një kartëmonedhe të dyshuar të falsifikuar prej 20 eurosh. Patrulla policore ka identifikuar tre persona të dyshuar:
-
Sh. V. (27), shtetas i Kosovës
-
N. Z. (30) dhe M. O. (28), shtetas palestinezë
Gjatë kontrollit policor janë sekuestruar një sasi e vogël e substancës së dyshuar narkotike, dy mulli për bluarje dhe kartëmonedha e dyshuar.
Me urdhër të prokurorit të shtetit, janë iniciuar procedurat penale. Dy shtetasit e huaj janë ndaluar për 48 orë, ndërsa shtetasi kosovar është liruar pas intervistimit.
Zbulime të reja gjatë hetimeve
Më 7 shkurt, gjatë vazhdimit të hetimeve, policia ka identifikuar banesën me qira të të dyshuarve në Ferizaj, ku janë gjetur dhe sekuestruar dokumente identifikimi të shteteve të ndryshme.
Po ashtu, është konstatuar se M. O. ishte subjekt i një urdhërarresti ndërkombëtar dhe se ishte shoqëruar nga një e mitur kosovare A. T. (17 vjeçe).
Gjatë kontrollit në banesën e saj në Kaçanik, policia ka gjetur:
-
39 kartëmonedha prej 50 dollarësh amerikanë, të dyshuara si të falsifikuara
-
Një sasi të vogël të narkotikëve
-
Dokumente identifikimi të huaja
Substanca narkotike i përkiste E. D. (19 vjeçe).
Procedurat ligjore
Të gjitha veprimet janë kryer në koordinim me Njësitin e Hetimeve të Kufirit dhe Prokurorinë Themelore në Ferizaj. E mitura është intervistuar në prani të prindit dhe avokatit mbrojtës, ndërsa ajo dhe E. D. janë liruar në procedurë të rregullt.
Hetimet janë në vazhdim, deri në zbardhjen e plotë të rastit.
