Policia e Kosovës ka arrestuar një person të dënuar me tre vjet burgim për veprën penale “keqpërdorim seksual i personave nën moshën 15 vjeç”.
Sipas njoftimit zyrtar, arrestimi është realizuar gjatë ditës së djeshme nga Njësia për Realizimin e Urdhëresave, në kuadër të Stacionit Policor Veriu në Prishtinë, pas lokalizimit të personit që ishte në kërkim.
I arrestuari, E.M., 26 vjeç, pas ndalimit është dërguar për vuajtje të dënimit, në përputhje me vendimin e formës së prerë të gjykatës.
Policia e Kosovës ka falënderuar qytetarët për bashkëpunimin dhe ka riafirmuar përkushtimin e saj për garantimin e sigurisë publike, parandalimin e rreziqeve dhe ndëshkimin e çdo vepre penale që cenon rendin dhe qetësinë publike.
