WhatsApp ka denoncuar një përpjekje të autoriteteve ruse për të bllokuar funksionimin e aplikacionit në vend, duke e cilësuar si një “hap prapa” për lirinë digjitale.
Sipas një deklarate të një dege të Meta Platforms, qeveria ruse ka tentuar ta bllokojë plotësisht aplikacionin me qëllim që përdoruesit të orientohen drejt një shërbimi alternativ të kontrolluar nga shteti.
Kjo lëvizje vjen pasi rregullatori rus kishte vendosur më herët kufizime edhe ndaj Telegram, në kuadër të një goditjeje më të gjerë ndaj rrjeteve sociale të huaja.
Reagon Kremlini
Nga ana tjetër, Moska ka deklaruar se aplikacioni mund të zhbllokohet nëse kompania respekton legjislacionin rus dhe tregon gatishmëri për dialog.
Zëdhënësi i Kremlinit, Dmitry Peskov, tha për agjencinë shtetërore Tass se çështja lidhet me pajtueshmërinë me ligjet ruse.
“Nëse Meta i përmbahet ligjeve ruse dhe nis dialog me autoritetet, atëherë ekziston mundësia e arritjes së një marrëveshjeje”, u shpreh Peskov.
Ndërkohë, rregullatori i telekomunikacionit në Rusi konfirmoi se ka marrë masa për të ngadalësuar funksionimin e WhatsApp-it, duke pretenduar se aplikacioni përdoret për organizim aktivitetesh terroriste dhe për zhvatje financiare.
Alternativa shtetërore “Max”
Autoritetet ruse po promovojnë një aplikacion të ri mesazhesh të quajtur Max, i ofruar nga kompania VK që nga viti 2025.
Max ofron integrim me shërbimet qeveritare dhe platformat tregtare online, por kritikët theksojnë se ai ka rregulla më të dobëta për mbrojtjen e të dhënave personale. Disa disidentë rusë kanë ngritur shqetësime se synimi i autoriteteve është monitorimi i komunikimeve private të qytetarëve.
Tensionet mes kompanive perëndimore të teknologjisë dhe autoriteteve ruse kanë qenë të vazhdueshme vitet e fundit, me një sërë kufizimesh dhe bllokimesh ndaj platformave të huaja.
