Ardian Gjini ka shpallur kandidaturën për drejtimin e Aleanca për Ardhmërinë e Kosovës (AAK), menjëherë pas dorëheqjes së kryetarit të deritanishëm, Ramush Haradinaj.
Kandidatura e Gjinit u bë publike në mbledhjen e Këshillit të Përgjithshëm të AAK-së, vetëm pak çaste pasi Haradinaj njoftoi se nuk do të rikandidojë në zgjedhjet e brendshme të partisë.
Haradinaj: Koha, rezultati dhe besimi në kuadër
Haradinaj deklaroi se procesi zgjedhor brenda partisë do të nisë më 20 shkurt, duke theksuar se vendimi për të mos kandiduar vjen për disa arsye.
“Procesi zgjedhor fillon nga 20 shkurti. Është risi ose ndryshim sepse nuk do të kandidoj për kryetar të Aleancës në këto zgjedhje të brendshme. Një arsye është koha e gjatë, arsyeja e dytë është rezultati zgjedhor. Po ashtu është edhe besimi që kam në kuadrin e Aleancës”, është shprehur ai.
Me shpalljen e kandidaturës së Gjinit, gara për drejtimin e AAK-së zyrtarisht ka nisur, ndërsa pritet të shihet nëse do të ketë kandidatë të tjerë në procesin zgjedhor të brendshëm të partisë.
