Kryetari i Partia Demokratike e Kosovës, Memli Krasniqi, ka bërë thirrje për mobilizim masiv në marshin e paralajmëruar për 17 shkurt në Prishtinë, duke e cilësuar atë si një moment vendimtar për vendin në fazën finale të procesit gjyqësor në Hagë.
Krasniqi rikujtoi marshin e kaluar në kryeqytet, për të cilin tha se mblodhi rreth 100 mijë qytetarë, duke e cilësuar si dëshmi të fuqisë së përbashkimit qytetar në thirrjen për drejtësi.
Sipas tij, dalja e radhës në shesh nuk ka të bëjë me një individ, një parti apo një grup të caktuar, por me dinjitetin kombëtar e shtetëror, me të vërtetën historike dhe me të drejtën për një gjykim të drejtë dhe të paanshëm.
“Thirrja jonë mbetet e qartë dhe e pandryshuar: Drejtësi, jo politikë! Liri për çlirimtarët!”, ka deklaruar ai, duke ftuar qytetarët që të marrin pjesë në marshin e 17 shkurtit në Prishtinë.
