Presidenti i Shteteve të Bashkuara, Donald Trump, ka bërë të ditur se administrata amerikane po planifikon të dërgojë një spital lundrues në Grenlandë, me qëllim ofrimin e shërbimeve shëndetësore për banorët e këtij territori arktik.
Lajmin e bëri publik vetë Trump përmes një postimi në rrjetin social Truth Social, duke theksuar se iniciativa po realizohet në bashkëpunim me guvernatorin e Luizianës, Jeff Landry, të cilin e ka emëruar edhe të dërguar të posaçëm për Grenlandën.
Sipas presidentit amerikan, spitali lundrues do të përdoret për trajtimin e shumë personave të sëmurë që, sipas tij, nuk kanë qasje të mjaftueshme në shërbime mjekësore në këtë territor të largët.
“Në bashkëpunim me guvernatorin fantastik të Luizianës, Jeff Landry, do të dërgojmë një spital lundrues në Grenlandë për t’u kujdesur për shumë njerëz që janë të sëmurë dhe nuk marrin trajtim atje”, shkroi Trump.
Deklarata u publikua vetëm pak orë para një darke me guvernatorë republikanë në Shtëpinë e Bardhë, ku presidenti amerikan u ul pranë Landry-t dhe zhvilloi një bisedë të gjatë me të.
Megjithatë, deri tani nuk është bërë e qartë nëse ky projekt është kërkuar nga autoritetet e Grenlandës apo nga Danimarka, shteti të cilit i përket territori autonom. As Shtëpia e Bardhë dhe as zyra e guvernatorit Landry nuk kanë dhënë detaje shtesë për mënyrën e realizimit të planit dhe për pacientët që pritet të përfitojnë nga ky spital lundrues.
Trump ka shprehur disa herë në të kaluarën interesin që Shtetet e Bashkuara të marrin kontrollin e Grenlandës, një ishull strategjik në rajonin e Arktikut për shkak të burimeve natyrore dhe pozicionit gjeopolitik.
